Suyun əhəmiyyəti

Su yaxşı həlledici olduğuna görə təbiətdə dövranı zamanı onda oksigen, karbon qazı, duzlar və başqa maddələr həll olur; buna görə təbiətdə su, əsasən, qarışıq şəklində olur. Təbiətdə olan suyun çox hissəsi duzlu sudur və bu su, əsasən, okeanlarda və dənizlərdə cəmləşib. Bulaqların, çayların və göllərin suyunda isə duzun miqdarı nisbətən az olur; biz bu sulardan içməli su kimi istifadə edirik. İçməli suyun tərkibində müxtəlif həll olmuş duzların olduğunu suyun qaynaması zamanı qabın dibində tədricən ərpin əmələ gəlməsi ilə müşahidə edirik, çünki su qaynayan zaman suda həll olmayan maddələr əmələ gəlir və onlar qabın dibinə çökür. İçməli suyun tərkibindəki maddələri satışa çıxarılan suların qabı üzərindəki etiketlərdə də görmək olar. Təmizlənməmiş suyu su hövzələrindən birbaşa içmək olmaz, çünki suyun dövranı zamanı ona bəzi zərərli maddələr qarışır və suyun tərkibində bəzi zərərli mikroorqanizmlər də olur. Bunun üçün su istifadəyə verilməmişdən əvvəl xüsusi qurğularda təmizlənir: su əvvəlcə filtrlənir, sonra isə tərkibindəki zərərli mikroorqanizmləri və maddələri zərərsizləşdirmək üçün xüsusi üsullar tətbiq edilir — bu məqsədlə, əsasən, dezinfeksiyaedici maddələr olan xlordan və ya ozon qazından istifadə olunur. İçməli sudan həmçinin kənd təsərrüfatında, sənayedə və məişətdə də istifadə edilir. Su insan orqanizmində olan ən vacib maddələrdən biridir — insan orqanizmi kütləsinin təqribən 2/3 hissəsi sudan təşkil olunub, insan orqanizmində baş verən reaksiyalar isə əsasən su mühitində gedir.