Mail müstəvi

Mail müstəvi sadə mexanizmlərdən biridir. O, üfüqi səthlə müəyyən bucaq əmələ gətirən düz səthdən ibarətdir. Mail müstəvinin tətbiqi ağır yükləri kiçik qüvvə ilə müəyyən hündürlüyə qaldırmağa imkan verir. Cismi mail müstəvi boyunca qaldırmaq üçün tələb olunan qüvvə $F = \frac{mgh}{l}$ düsturu ilə hesablanır, burada $h$ — mail müstəvinin hündürlüyü, $l$ — onun uzunluğudur. Göründüyü kimi, $l > h$ olduqda $F < mg$ olur, yəni qüvvədə qazanc əldə edilir. Qüvvədə qazanc nisbəti $\frac{mg}{F} = \frac{l}{h}$ kimi ifadə olunur. Mail müstəvidə qüvvədə nə qədər qazansaq, məsafədə bir o qədər uduzuruq: cismi $l$ qədər çəkmək lazımdır. Praktikada mail müstəvilər pandus, dağ yolları (serpantin), pilləkənlər və s. şəklində qarşımıza çıxır. Mail müstəvidə sürtünmə qüvvəsi nəzərə alınmadıqda görülən mexaniki iş $A = F l = m g h$ kimi sabit qalır.