Birləşmiş qablar

Birləşmiş qablar aşağı hissədən bir-biri ilə birləşmiş iki və ya daha çox qabdan ibarət sistemdir. Bu qablara eyni maye töküldükdə, formalarından, en kəsiklərindən asılı olmayaraq, bütün qollarda mayenin sərbəst səthi eyni üfüqi müstəvidə yerləşir. Bu hadisə Paskal qanunu ilə izah olunur: maye özünə göstərilən təzyiqi bütün istiqamətlərə bərabər ötürür, nəticədə eyni dərinlikdə təzyiq bərabər olur, bu da səviyyənin eyniləşməsinə səbəb olur. Əgər qollara bir-biri ilə qarışmayan müxtəlif sıxlıqlı mayelər tökülərsə, sıxlığı kiçik olan mayenin sütunu daha hündür olur. Tarazlıq şərti: $\rho_1 g h_1 = \rho_2 g h_2$, buradan $\rho_1 h_1 = \rho_2 h_2$. Birləşmiş qablar prinsipi bir çox qurğularda istifadə olunur: çaynik, suölçən şüşə, fontan, artezian quyusu, suvarma sistemləri.