Kimya nəyi öyrənir? Kimya laboratoriyası ilə tanışlıq və iş zamanı təhlükəsizlik texnikası qaydaları

Kimya maddələrin tərkibini, quruluşunu, xassələrini və bir maddənin digərinə çevrilməsi qanunauyğunluqlarını öyrənən təbiət elmidir. Kimya cansız təbiətin bir hissəsini — maddələrin çevrilməsini tədqiq edir. Fizikadan əsas fərqi ondan ibarətdir ki, fizika enerji və ümumi təbiət hadisələrini, kimya isə maddələrin keyfiyyət dəyişməsini — yəni bir maddənin tamamilə yeni xassəli digər maddəyə çevrilməsini öyrənir. Kimya laboratoriyasında işləyərkən təhlükəsizlik qaydalarına ciddi riayət edilməlidir: kimyəvi maddələri dadmaq qəti qadağandır; maddənin iyini bilmək üçün ovuc içi ilə havanı buruna yönəltmək lazımdır; bütün təcrübələr müəllim nəzarəti altında aparılmalıdır; qoruyucu eynək, xalat və əlcəkdən istifadə olunmalıdır; üzvi həlledicilər alovdan uzaq saxlanılmalıdır; tullantılar xüsusi qablara atılmalı, iş bitdikdən sonra əllər sabunla yuyulmalıdır.